Chapter ١٧✨

.

-السعودية-

ساره: "يمة لازم نحاكي عليا اخاف يصير شي بسلطان و هي مو موجودة"

-"لا لاتخربين عليهم توهم"

رنا: "ياخالتي ساره صادقة، عليا بتزعل ان درت انه مريض ولا احد علمها"

ساره: "ها يمه احاكيها؟"

-"بكره حاكيها"

ساره: "ليه بكره؟"

-"خلاص بكره قلت!"

.

-عليا-

طلعنا مفروض نتغدا غدا ناس بشهر عسل..

بس عبدالله ما كان عبدالله اللي طلع معاي اخر مره،

يناظر الشارع و السيارات ولا يناظر وجهي، 

بالمطعم يناظر الناس الرايح والجاي ولا يناظر وجهي، 

و حنا ناكل العادة هو يوكلني هالمره ياكل و هو ساكت ولا حاكاني بعد، 

سبحان الله..

يوم كان هو يركض وراي كنت انا ما ابيه..

و يوم صرت انا اركض وراه صار هو مايبيني..

ليه حنا دايم كذا؟ 

يمكن لأني بالبداية ضمنت انه ميت عليّ، انه مهما سويت بيركض وراي؟

و لما شفته وقف، و دار ظهره صرت انا اللي اركض؟

حسيته بيروح مني 

ما كنت ابي اخسره.. توني حسيت بقيمته..

مع انه كان طول الفترة اللي راحت حولي..

..

رجعنا الاوتيل..

عبدالله: "انا بروح اشري لك الجوال و اجيك"

-"لحظة ابحاكيك.."

عبدالله: "هلا تبين شي؟"

-"عبدالله والله ادري اني غلطانه و مره غلطانه بعد مو شوي، و استاهل انت معاك حق تسوي اي شي تطلقني تزعل تسوي اي شي.. بس والله اني احبك ومابي اخسرك.. تكفى سامحني عبدالله علمني وش اسوي علشان تسامح و تنسى"

عبدالله: "اسامح ايه، بس انسى ماظنيت ياعليا ماظنيت"

-"قولي شلون انسيك؟ شلون اكفر عن ذنبي؟"

عبدالله: "عليا مو سالفه غلطة صغيرة و تراضيني و ارضى و انسى، شلون تبيني اسمع زوجتي تقولي انه لمسها واحد قبلي ماتعرفه ولا يعرفها و اسكت؟ او انسى و يمشي الموضوع كأنه ماصار شي؟"

-"لمتى بتقعد كذا؟ لمتى بتظل متذكر؟"

عبدالله: "ماعرف، ماعرف اذا ممكن انسى اصلا"

-"طيب.. طلقني"

عبدالله: "اطلقك؟"

-"ايه، انا احبك و كل شي بس مابيك كذا تظل متذكر وتظل حايمة كبدك مني، ودامني مثل ما انت شايف ليش نكمل مع بعض؟" 

عبدالله: "لو ابي اطلقك طلقتك من قلتيلي، بس انا اللي ما ابي"

-"ليش ما تبي؟ علشان تذكرني فيها طول حياتي صح؟"

عبدالله: "وهو شي مثل هذا ينتسى بكل بساطة بالنسبة لك؟"

-"عبدالله، تكفى يا عبدالله والله تعبت، حرام عليك اذا بتسوي فيني كذا طلقني"

دق جواله فجأة و قطعنا.

عبدالله: "رقم سعودي"

-"رد يمكن احد يبيك ضروري"

عبدالله: "الو، هلا والله الحمدلله بخير انتم وشلونك وشلون الوالدة وشلون صحتها؟ لا حنا بخير الحمدلله و عليا تسلم عليكم، سم؟ وشلونه الحين؟ ايه دريت قبل البارح، خلاص ان شاءلله، ايه لا ان شاءلله كل شي تمام بعلمك انا بالتفاصيل، يلا نشوفك ان شاءلله مع السلامة"

-"مين؟ سلطان البثر صح؟"

سكت.

-"وش يبي منك؟"

عبدالله: "لا سعد.."

-"سعد اخوي؟ غريبة وش فيه وش يبي؟ وشو اللي وشلونه الحين؟ و التفاصيل؟ من متى بينكم كذا سوالف؟"

عبدالله: "عليا حنا بكره لازم نرجع"

-"نرجع وين؟ ليه! امي فيها شي؟"

عبدالله: "لا امك بخير"

-"اجل؟ دقيقة انت علمت سعد اخوي عن اللي قلتلك اياه؟"

عبدالله: "لا لا ماعلمت احد اهدي و اسمعيني" 

-"وشو اجل وش فيهم؟"

عبدالله: "سلطان اخوك"

دمعت عيوني من دريت ان سلطان فيه شي...

كنت ما استبعد اسمع اي خبر عنه ..

اسمع انه بأي لحظة خلاص اختفى ..

-"ووو-وشف-ففيه سلطان اخوي؟"

عبدالله: "تعبان شوي و بالمستشفى صارله كم يوم"

-"كم يوم؟ حنى عرسنا قبل كم يوم!"

عبدالله: "اين عقب ما سافرنا.."

صحت. -" ووشفيه يعني وش صارله؟ طيب حالته شلون الحين قويه اللي فيه ولا خفيف زي كل مره؟ يلا مشينا نروح لهم بسرعة تكفى عبدلله"

عبدالله: "لا اليوم ما يمدي بكره علشان يمدينا نحجز"

-"الحين احجز عبدالله مابيه يموت"

عبدالله: "عليا، موب ميت ان شاءلله، هدي انتي و جهزي اغراضك علشان الصبح نمشي"

عجزت انام ذيك الليله..

على كثر ما عجزت انام كل الثلاث ليالي اللي قبلها كانت هذي غير..

هذا اخوي.. 

"عليا انتي اختي، انتي صديقتي، انتي صديقة الطفولة، انتي امي انتي بنتي اني كل شي.. وانتي تدرين اني احبك واخاف عليك اكثر من نفسي صح؟ مابي اجبرك على شي انتي ماتبينه بس بعد مابي اموت وانا ماتطمنت عليك.. وسعد قال ان عبدالله رجال زين و يخاف ربه و بيصونك و يحافظ عليك.. يعني موب قاعدين نقطك على واحد مانعرفه، كله علشان مصلحتك والله، ما اضمن الدنيا وش تسوي فيك بعد عيني.."

سلطان لا ياسلطان لا الله يخليك...

والله مابقالي الا انت شي حلو في هذي الدنيا..

مانمت..

ظليت ادعي طول الليل.. 

الساعة ٧ صحيت عبدالله..

-"عبدالله الساعة ٧ متى بنروح؟"

عبدالله: "لسا عشر"

-"ليه عشر متأخر قوم نقدمها واللي يعافيك"

عبدالله: "استغفرالله العظيم، عليا بابا مابقى شي على عشر حطي راسك والله عجزت انام منك"

-"عجزت تنام مني؟"

عبدالله: "موب كذا بس يعني نحتاج نرتاح قبل السفره طويله تراها، انتي بعد ارتاحي"

-"انا ما ارتاح الا لو شفت اخوي"

..

-بالسعودية-

سلطانه: "يمه انا بروح اشري قهوة"

-"خذي احد معك لاتروحين بلحالك"

سلطانه: "يمة قهوة هنا قريبه وشفيك"

-"سلطانه قلتلك يا تاخذين احد معك يا ارجعي البيت لاتحنين فوق راسي"

سلطانه: "ارجع البيت؟ خلاص حلو يلا بحاكي السواق"

-"لا لا لاترجعين"

سلطانه: "هاو يمه! يا قهوة يا بيت"

-"خلص روحي روحي اشري قهوة و فكيني من حنتك!"

راحت.

رنا تضحك على خفيف: "خالتي اللي يهداك؟ وشفيك تقولينها روحي البيت عقب تعصبين و تقولين لا؟"

تنهدت- "اخخ بس من هالسلطانه"

رنا: "وشفيها؟"

-"اعلمك بس ما تعلمين احد؟"

رنا: "هاو وشدعوه ياخاله"

-"ولا سعد"

رنا: "ولا سعد، بس علميني وشو"

-"سلطانه يا رنا مادري وش اسوي معها.. المدرسة حاكوني قالو انه مسكوها اكثر من مره مع بنات مدري وش يسوون"

رنا: "وش يسووون!"

-"قصري صوتك، موب مضبوطين"

رنا: "موب مضبوطين من اي ناحية؟"

-"شلون يعني من اي ناحية"

رنا: "يعني سلطانه احس مره ماعندها هالسوالف، سلطانه ماكانها بنت"

-"مو هذا اللي مضيعها"

رنا: "دقيييقة موب مضبوطين قصدك كذا؟ احسب قصدك شي ثاني، تتوقعين يا خاله ان سلطانه ممكن تكون كذا؟"

-"والله انا صرت اخاف من اللي اشوفهم بالبيت صديقاتها"

رنا: "يمه يجون البيت، طيب لاتخلينهم يجون"

-"كذا راح ازيد المشاكل اكثر"

رنا: "بتسكتين لها و بتزيد بعد المشاكل!"

-"اذا قام سلطان بالسلامة ان شاءلله ابقعد و احكي معها"

رنا: "تبين اساعدك؟"

-"لا انا ودي بعليا، كانت هي اللي تحاكيها دايم"

رنا: "ياحبيبتي ياعليا، الا وينهم الحين ما حاكيتيهم؟"

-"حاكيتهم من ساعتين قالو بالطيارة توهم"

رنا: "اوه يعني لسا يبيلهم وقت"

..

-بالطيارة-

-"متأكد انك حاكيته؟"

عبدالله: "ايه سعد اخوك قالي انا بجيكم"

-"طيب حاكيه الحين شوف وينه"

عبدالله: "هذا هو شوفيه هناك"

رحنا مع سعد بسيارته و اخذنا على المستشفى، 

سعد و عبدالله طول الطريق يسولفون وانا ساكته.

وصلنا المستشفى..

وداني سعد للغرفة، 

حبيت راس امي اللي كانت ميته صياح..

و سلطان اللي نايم بجمبها على السرير..

نحفان كأني ما شفته من سنين..

مسكت ايده كانت حارره..

و صوت تنفسه قوي..

ناظرت أمي: "من متى و هو كذا؟"

امي: "كم يوم.."

-"و ما تحسنت حالته من كم يوم؟"

امي *صاحت*: "والله يا يمه مادري، ان شاءلله ان شاءلله انه يتحسن.."

صحت معها.

جا عبدالله و سعد.

سعد: "هذا يمه عبدالله جا"

امي: "هلا ياولدي وشلونك وشلون سفرتكم، والله ماكان ودي نخرب عليكم "

"يمه وش تخربين علينا مفروض من يصير اي شي تعلمينا نجي!"

امي: "توكم عرسان ماصارلكم اسبوع"

"هه"

عبدالله: "وش دعوه يا خاله سلطان نفس اخوي، الله يشفيه و يقومه سالم ان شاءلله"

سعد: "عبدالله تغديتوا؟"

عبدالله: "لا عيت عليا نسوي اي شي من قمنا رحنا المطار"

سعد: "من يومها مصفوقه اختي كان ماسمعت كلامها، تعالو خلني اغديكم بمطعم"

"تغدينا بمطعم ولا كأنك اخوك كذا حالته؟"

سعد: "بيموت يعني لو رحت المطعم؟"

"بسم الله عليه!!"

امي: "سعد يمه وش هالحكي الله يهديك"

سعد: "سلطان مافيه الا العافية و محد يموت بغير يومه، موب المطعم اللي بيموته"

"طيب طيب روح تغدنا و فكنا"

عبدالله: "منتيب جاية؟"

"لا شكرا انتو تغدو عليكم بالعافية"

عبدالله: "خالتي تجين تتغدين؟"

امي: "والله ماودي اترك سلطان انتو روحو"

سعد: "يا يمه عليا عنده و الحين احاكي رنا تجي، تعالي انتي تغدي و ريحي بالبيت شوي و بالعصر تعالي"

"ايه يمه روحي شكلك تعبان انتي بعد، لاتخافين سلطان انا عنده"

امي: "خلاص ان شالله، اروح البيت ابدل و انام ساعتين واجيك، حاكيني كل شوي و طمنيني"

"ان شاءلله"

مسك سعد ايد امي و طلعو برا الغرفة.

عبدالله: "خذي عليا جوالي خليه معك"

"لاعادي فيه تلفون المستشفى اذا ابي شي استخدمه"

عبدالله: "خذي هذا علشان انا اتطمن عليك، مرت سعد بتجي ماقدر اشوفك"

"ان شاءلله" اخذت الجوال.

عبدالله: "يلا تبين شي؟"

"سلامتك"

طبطب على كتفي: "الله يسلمك.. مع السلامة" وطلع وراهم.

جلست عند سلطان شوي...

كنت اقرا قرآن وانا جالسه بجمبه.. 

شوي و فتح عيونه..

"حبيبي تبي شي؟"

سلطان: "عليا.. انتي رجعتي؟" يالله يحكي..

"ايه رجعت"

سلطان: "ليه"

"رجعت وشلون اقعد مسافرة وانت هنا"

سلطان: "انا مافيني شي" و قام يكح.

"سلطان حبيبي لاتحكي ريح نفسك.. تبي شي يوجعك شي؟"

سلطان: "عبدالله جا معك؟"

"ايه توه كان هنا، تبيه بشي؟"

سلطان: "لا.. ليش رجعتو.. مابي اصير حمل ثقيل عليكم"

"انت حمل ثقيل يا سلطان؟ انت لو تبي عيوني عطيتك بنفس راضية"

ابتسم.. 

"قل امين، الله لايحرمني من هالابتسامة"

سلطان: "ولايحرمني منك"

"يلا انت سكر عيونك ولاتحكي، ارتاح"

سلطان: "احد يشوف هالوجه اللي كأنه طماط حمرا ولايرتاح؟"

"ياربيه حتى وانا مريض تحارش؟ حمرا من الصياح عليك ياللي ما تستاهل"

سلطان: "وقفي صياح الرجال مايصيحون"

ضحكت: "مين مفهمك اني رجال؟"

سلطان: "اجل وشو"

-"يازينك تو وانت ساكت"

ضحك: "دقي على الممرضة"

-"ليه"

سلطان: "دقي ابيها"

-"ليه وش تبي؟"

سلطان: "ابيها"

-"تبيها بوشوو"

سلطان: "مريض يعني وش يبي بالممرضة"

-"ايه وش تبي انا اجيبلك؟"

سلطان: "عليا ابي حمام، حمام، زين كذا؟"

ضحكت: "يلا يلا بدق"

اتصلت على المكتب اللي برا،

-المكتب اللي برا-

ممرضة ١: "غرفة ٢٢٢٢ ساره ردي، "

ممرضة ٢ (ساره): "الو، ايه؟ ان شاءلله الحين جاية"

راحت الغرفة.

-"السلام عليكم"

ممرضة ١: "هلا دكتور فهد و عليكم السلام، الحمدلله على السلامة، توني اشوفك"

-"الله يسلمك، وين الممرضة ساره؟"

ممرضة ١: "تو حاكوها راحت تشوف مريض"

-"وين اي غرفة؟"

ممرضة ١: "هنا قريب غرفة ٢٢٢٢"

-"بتطول؟"

ممرضة ١: "مدري والله، تبي منها شي ضروري؟"

-"ايه، مايخالف تقولينلها تمر مكتبي اذا خلصت ابيها تعطيني كل الملفات اللي كنت مو موجود بوقتها،"

ممرضة ١: "بس دكتور فترة طويلة كنت مو موجود"

-"ادري انه فترة طويلة! قوليلها تجيبهم معها على مكتبي"

ممرضة ١: "ان شاءلله دكتور"

-غرفة ٢٢٢٢-

-"وشلونه الحين؟ احسن؟"

ممرضة ٢ (ساره): "الحمدلله حالته مو خطره، اثر العلاج نفسي *تبتسم* ليتك قايلنا من زمان كان حاكينا الاخت تجي"

-"لا لا اصبري تراي صدق اخته"

ممرضة ٢ (ساره)*ابتسمت*.

سلطان: "صدق اختي وشدعوه مهبول انا خويتي كذا؟"

-"كل تبن يحصلك اصلا!"

ممرضة ٢ (ساره)*تضحك*: "وش اسمك؟"

-"عليا"

ممرضة ٢ (ساره)*ابتسمت*: "يلا عن اذنكم انا لازم اروح"

-"شكرا يعطيك العافية"

طلعت الممرضة سارة من الغرفة و راحت لمكتبهم.

ممرضة ١: "ساره قبل شوي جا الدكتور فهد منفس، قال جيبي له كل الملفات اللي بالفتره اللي كان مو موجود فيها و وديهم على مكتبه"

ممرضة ٢(ساره) : "وييه ملفات ٩ مدري ١٠ شهور شلون اطلعهم؟"

ممرضة ١: "مدري عنه من صحى من هالحادث و هو منفس على كل احد!"

ممرضة ٢(ساره): "حرام الله لا يورينا اللي شافه مسكين، انا خلني اروح ادور الملفات"

..

بالليل عيو المستشفى ان احد ينام عند سلطان غير سعد.

رجعت بيتنا انا و امي و رنا.

امي: "يمه حاكي رجلك"

-"احاكيه وش اقوله"

امي: "حاكيه شوفي يبيك تنامين وين"

-"انا ابي انام هنا"

امي: "طيب حاكيه استأذني منه"

-"يمه تكفين وشو استأذن"

امي: "زوجك لازم تستأذنين! ولا لا يا رنا؟"

رنا تبتسم: "ايه دقي دقي ياعليا"

-"بتفهميني انك تشاورين سعد اذا بتنامين ببيت اهلك؟"

رنا: "زوجك هاو! لازم يدري وين نايمه انتي!"

-"ايه اعلمه اني بنام هنا يعني، موب استأذن"

رنا: "دقي دقي بس"

..

حاكيته من جواله اللي معي، على رقم غريب هو دق عليّ منه.

-هلا عليا

-هلا شلونك

-الحمدلله انتي وشلونك؟ خالتي وسلطان شلونهم؟

-بخير الحمدلله، عبدالله انا بنام ببيت اهلي طيب؟

-ايه خليك مع خالتي تحتاجلك

-ان شاءلله ايه اكيد

-يلا نوم العافيه حاكيني اذا تبين شي

-ان شاءلله، انت بعد

-يلامع السلامة.

-مع السلامة.

يتبع...