-أحبك حب ورب البيت حلفت و ربي يسمعنا..
و واثق انك تحبني تموت و تعرف اخباري..
لكن بالصدر غصّة تكدرنا و تمنعنا..
ياخوفي اكرهك في يوم وانا والله مو داري..
اخذت نفس: "دكتور، واللي يرحم والدينك، حس شوي ان اللي واقفة قدامك بشر، انسانه، عندها مشاعر طيب؟ بس احتاج منك تحس بهالشي طيب؟ تراي موب جدار"
-"حاس"
"طيب زين انك حاس! ممكن تقوم الحين و تشوف شغلك مع مريضتك؟"
-"واذا كنت انا المريض؟"
"نعم؟"
-"انا مريضك عليا، انا مريض فيك، و عجزت اشفى من هالمرض"
"ليش قاعد تقولي كذا؟ وش تبي بالضبط ليش تحب تسوي كذا"
-"لاني انا نفسي موب عارف وش ابي"
"خلاص لاتدخلني بالموضوع!"
-"عليا ساعديني، انا اكبر من اللي انتي تبينه، وانتي اصغر من اللي انا ابيه، وش اسوي"
"مافهمت"
-"انتي تبيني حبيب، وانا كبير على هالشي.
وانا ابيك زوجة وانتي اصغر من هالشي"
"زوجة!"
-"ايه"
جلست اناظره مصدومه من اللي قاله.
"عليا"
قمت، "هلا سعد"
ناظر سعد اخوي الدكتور.
"اه سعد هذا الدكتور حق امي، دكتور هذا سعد اخوي"
سعد -"بشر دكتور وشلون حالتها؟"
-"للحين ما تأكدت من حالتها، بس الظاهر قلبها ضعيف"
"شلون ضعيف!"
سعد -"طيب و متى بتتأكد؟"
-"ان شاءلله عقب ماتطلع نتيجة الاشعة و التحاليل"
سعد- "ومتى بتطلع؟"
-"بكره"
سعد- "يعني ترجع البيت اليوم؟"
-" لا بخليها هنا احسن"
سعد- "طيب عليا وينها الحين"
"جوا"
سعد- "طيب انتي ارجعي البيت الحين انا اقعد عندها"
"لاعادي ماعندي شي"
سعد- "روحي الوقت متأخر، انا بنام عندها بكره الصبح انتي تعالي اذا رحت الدوام"
"طيب"
سعد- "حاكيتي ساره؟"
"ايه"
سعد- "حاكيها قوليلها مايحتاج تجي"
"طيب.."
سعد- "يلا تصبحين على خير حبيبتي"
"وانت من اهله"
ورحت.
رجعت حاكيت سارة و قلتها و كل شي.
كلام الدكتور جالس ينعاد في راسي كانه شريط.
انعاد مليون مره.
يعني هو مابغاني موب علشاني موب زينه..
هو مابغاني علشاني صغيرة...
يعني هو متقبلني كذا
راضي فيني كذا
يبيني وانا كذا
وانا على سريري افكر دق.
خفت ارد.
الساعة كانت ٣ الفجر.
"الو.."
-"صحيتك؟"
"لا صاحية مانمت"
-"ليه"
"ماجاني النوم"
-"تفكرين فيني؟"
سكتّ.
-"لاني انا بعد ماجاني النوم لاني افكر فيك"
سكتّ......... حسيته حلم.
موب صدق
-"عليا لاتسكتين"
"وش اقول"
-"قولي اللي بقلبك"
"قلته مره و ندمت"
-"لا اوعدك هالمره منتب ندمانه"
"دكتور، انت بنفسك قلت ان الموضوع صعب، لان كل واحد يبي شي الثاني مايقدر عليه"
-"ماعليه.. اصبر، صبرت كل هالفترة ماجت على كم سنه"
"شلون يعني"
-"يعني احبك"
"دكتور انا لازم اسكر"
-"اسمي فهد"
"دكتور فهد انا لازم اسكر"
-"بشوفك بكره؟"
"تشوفني وين!"
ضحك: "بالمستشفى شفيك"
"ان شاءلله"
-"غرت من اخوك اليوم"
"هاه؟"
-"لما قالك تصبحين على خير حبيبتي..."
سكت.
-"تسمحين لي اقولها؟"
سكت.
-"تصبحين على خير عمري، أحبك ماتدرين وش كثر.."
سكت....
-"مافي وانت من اهله؟"
"وانت من اهله"
-"احبك"
"مع السلامه"
-"مع السلامة.."
سكرت.
اناظر الجوال مرتاعه.
مو مصدقة.
مين اللي كان يحكي معي؟
الدكتور نفسه؟
و وراي انلخمت كذا؟
الحين عليا ام لسان وين راح لسانها؟
بس وش قاعد يقول؟ ليه قلبي صار يدق لما سمعت اللي قاله؟
قال كلام حلو... كلام عجزت ارد عليه
كلام كنت احسه بس بالقصص والروايات اللي اقراها..
بس سمعته صدق.
و انقال لي...
ومن شخص كنت ميته و اسمع منه حكي كذا...
بس بعد وشو؟
لو ان امس ماصار... لو اني ماسويت الي سويته امس...
دق جوالي!
"سلطان اخوي"
-هلا سلطان
-من تحاكين اخر الليل ياللي ماتستحين ادق عليك مشغول
ضحكت-
-ماعندنا بنات يستعملون جوالاتهم بالليل يحاكون حبايبهم
ضحكت- كلب اشتقتلك
-من بكره الجوال يتسكر الساعة عشر و ينحط بالصالة *ضحك* والله اشتقتلك اكثر، وينك ماتسألين
-ما اسأل لاني تعبت من كثر ما اسأل و تصرفني تقول ادق عليك بعد شوي ولا تدق
-طيب طيب لا تبدين، يقولون امي تعبانه وشفيها؟
-مدري للحين ماقالو وش فيها بس هي بالمستشفى الحين مع سعد و بكره بيعلمونا وش فيها
-يعني مره تعبانه شي كبير؟
-تقول قلبي مدري
-الله يسمعنا خير، علموني اذا قالولكم وش فيها
-ان شاءلله
-و انتي يلا على سريرك و سكري جوالك
-ان شاءلله توني جاية ابنام اصلاً
-يلا نوم العافية مع السلامة
-الله يعافيك مع السلامة
ولا سأل عن اخته.
تبي شي تحتاج لشي...
سلطان كان اقرب واحد لي من اخواني.
بس قبل لايتخرج من للمدرسة ويروح برا
من سافر وعلاقتي فيه ماصارت مثل قبل
انشغل بحياته ولا عاد يسأل.. وانا ماعدت اشكي له..
نمت وانا بالي مشغول بالدكتور والكلام اللي قاله...
حاكتني سارة اختي الصبح صحتني نروح المستشفى.
وحنا بالغرفة جا الدكتور.
-"صباح الخير"
"صباح النور، سارة هذا الدكتور فهد، دكتور، سارة اختي"
ابتسمت سارة: "طمنا دكتور وشلون صحتها؟"
-"توني استلمت نتايج الاشعة و التحاليل، الوالدة عندها صعوبة في النبض و ضيق في القلب"
سارة: "ضيق في القلب؟ شلون هذي؟"
-"يعني عضلات القلب مشدودة و تضغط على باقي القلب و مخليته ضيق و صعب انه ينبض"
سارة: "بسم الله عليها من وشو هذا جاها؟"
-"من الله، العلاج ٥٠٪ منه راح يكون نفسي، احتاج منهم تخلونها سعيدة و تخلونها تضحك كثر ماتقدرون، تكونون حولها تسوون اي شي يسعدها مابيها تزعل ابد لانه خطر مره على صحتها، و مابيها تخاف ولاتبذل مجهود مثلا تركض او ترقى الدرج كثير"
سارة: "ان شاءالله ان شاءلله، بس خلاص تقدر تطلع من المستشفى؟"
-"ايه تقدرون تاخذونها بس العصر"
سارة: "اشوه الحمدلله شكرا دكتور"
-"العفو هذي بحسبة امي"
وطلع.
سارة: "وش هالدكتور اللي يفتح النفس"
"نعم؟"
سارة *تضحك*: "لاتنكرين انه عاجبك"
"الحمدلله والشكر"
سارة: "والله اجل وراك ساكته و مستحية"
"وشو تبيني ادخل بعيونه؟"
سارة: "عليا اختي تدخل بعيون اهله بعد! بس تناظر الارض هذي جديدة"
"طيب انا بروح اشتري قهوة تبين؟"
سارة: "لا شربت ببيتي"
"ازين بعد"
و طلعت.
الدكتور كان يحاكي وحدة من الممرضات.
يوم شافني جا مبتسم: "ياصباح الورد"
ابتسمت
-"وين رايحة"
"اشتري لي قهوة"
-"اشوه اني مابعد شربت قهوتي، نروح نشربها بمكتبي؟"
"مكتبك؟ وسارة اختي؟"
-"مايخالف قوليلها اي شي"
رحنا مكتبه
جلس على الكرسي و حط ايده على خده و ظل يناظرني
ابتسمت: "وبعدين؟"
-"عليا لاتغيرين اسلوبك معاي، انا حبيتك بشخصيتك القوية و لسانك الطويل، حبيتك وانتي دمك حار تنتظرين اي شي يصير علشان تهاوشين، لاتسكتين و تستحين كذا"
ضحكت: "وش اسوي نظراتك تجيب الحيا"
ضحك-" عمري اللي يعرفون يستحون بعد"
"ليه وش شايفني"
-"ايه ايه بالضبط كذا ابيك"
ضحكت
دق جوالي.
"دانا"
وقتك.
-هلا دانا
-عليا حبيبتي ترا جبت الي طلبتيه، تعالي اليوم خذيه مابي اخليه عندي"
"لاخلاص ماحتاجله"
-"وشو اللي ماتحتاجين له؟ انا جايبته علشانك!"
"تصرفي فيه دانا"
-"انتي تصرفي فيه! عليا لو اليوم ما جيتي اخذتيه من بيتي ابرسله انا بنفسي على بيتكم"
"لا لا شدعوة خلاص انا بمرك"
-"يلا مع السلامة"
"مع السلامة"
..
-"عسى ماشر؟"
"لا بس وحدة معاي بالمدرسة"
-"اكيد؟"
اقوله ولا ماقوله؟
-"ترا لو تحتاجين لاي شي انا موجود"
"لا لا بس استلفت مني كتاب و الحين تقولي خلصته خذيه"
ابتسم...
يتبع..
نحببببببكككك اميزينق تشابتر كيب قونينق بيبي ❤️❤️❤️❤️❤️❤️❤️
ردحذفLove it !!!
ردحذف